Pablo Martín Páez Gavira ose shkurt Gavi hyri mbrëmë në historinë e futbolli spanjoll. Mesfushori që aktivizohet tek Barcelona, u bë lojtari më ri në histori që luan me kombëtaren spanjolle. Vetëm 17 vjeç e 62 ditë, ai u fut në librat e rekordeve të futbollit spanjoll, por edhe atij botëror.
E djaloshi i ri jo vetëm që luajti titullar kundër Italisë brenda në “San Siro”, por madje edhe shkëlqeu në fitoren 1-2 të Spanjës, që siguroi finalen e Ligës së Kombeve.
Një talent i pastër siç i thonë në zhargonin e përditshëm, që shfaqi jo vetëm klas, por edhe personalitet e vendosmëri përballë kampionëve të Europës.
E ky është një leksion për futbollin në përgjithësi, e për atë shqiptar në veçanti. Pasi shpesh në vendin tonë kemi parë që rrallë herë iu jepet shansi të rinjve të tregojnë vlerat e tyre.
Lojtarët e rinj nuk konsiderohen titullar apo protagonistë, që bën që edhe shumë prej tyre të mos iu jepet shansi asnjëherë.
Spanja dha edhe njëherë shembull dhe leksion për të gjithë. Duke i besuar një adoleshenti kundër Italisë. Dhe në nivele të jashtëzakonshme futbolli, ku duhet jo vetëm talent, por edhe guxim dhe mentalitet. E nga kjo duhet të mësojnë edhe klubet tona, që të shfrytëzojnë sa më shumë elementët e rinj dhe cilësor.
Endri ÇINARI
