Tirana do të luajë me Teutën, por problemi kryesor i bardhebluve është Majkëll Ngo. Sulmuesi vazhdon të mos jetë në formë. Kjo u pa në sfidën me Laçin, ku nuk bëri pothuajse asgjë. Jo vetëm kaq, por sërish ai ishte pa gol në lojë.
Sulmuesi dje ishte si pa qejf. Doli i fundit nga dhomat e zhveshjes, nuk bëri nxehmjen si zakonisht, por për gati 10 minuta diskutoi me stafin teknik dhe në veçanti me trajnerin Orges Shehi dhe trajnerin e përgatitjes atletike, Kosta Jani.
Diskutimi ka qenë i gjatë, ndërsa Shehi është munduar të qetësojë anglezin dhe ta mbajë afër që ai të japë më të mirën në fushën e lojës. Më pas, anglezi ka vazhduar ushtrimet me pjesën tjetër të grupit. Gjithsesi, Tirana pret shumë nga sulmuesi që erdhi këtë sezon pas një viti pushim. Ngo ka shënuar në 13 takime katër gola, ndërkohë që pritshmëritë për të kanë qenë më të mëdha.
GJILPËRAT – Jo për të justifikuar askënd, por anglezi kishte një vit që nuk stërvitej. Nga ana tjetër, për probleme fizike, sulmuesi ka luajtur disa herë me gjilpëra këtë sezon.
E KALUARA – Sulmuesi anglez para këtij kampionati qëndroi tri sezone te bardheblutë, por palët nuk ia dolën të rinovonin në fillim të gushtit 2020. Me 13 gola dhe më shumë se 15 asiste, Ngo ishte parvjet titullar i padiskutueshëm, por që prej largimit nga Tirana luajti pak kohë në Qipro. Ngo ishte në dhjetor 2020 në Shqipëri për të arritur një marrëveshje të dytë me bardheblutë, por që nuk u arrit, sepse palët ishin larg me pretendime financiare dhe ato jashtë fushe.
Një vit është kontrata që e mban të lidhur Majkëll Ngonë me Tiranën. Për sulmuesin ky është sezoni i katërt me fanellën e bardhebluve. 13 gola dhe 16 asiste arriti të shënonte në tabelën e tij personale Majkëll Ngo. Këtë sezon numri i golave të shënuar nga anglezi është vetëm 4.
