Kylian Mbappe është plotësisht i përqendruar te “El Clasico” i së dielës, duke siguruar tifozët se Real Madrid është i vendosur të marrë tre pikët nga kjo ndeshje vendimtare.
Sulmuesi francez është ende në kërkim të fitores së tij të parë kundër Barcelonës që nga transferimi në Madrid. Mbappe dhe Real Madrid humbën të katër përballjet e sezonit të kaluar ndaj katalunasve.
Tani, nën drejtimin e Xabi Alonsos, “Los Blancos” janë të etur të rikthehen te fitoret ndaj rivalëve historikë. Presioni është mbi Mbappen, i cili shënoi pesë gola kundër Barcelonës sezonin e kaluar, për ta udhëhequr skuadrën drejt suksesit në ndeshjen më të madhe të fillimit të këtij sezoni në La Liga.
Mbappe tha se kjo është një javë shumë e rëndësishme për skuadrën, duke theksuar se ndeshja kundër Juventusit ishte e madhe, por ajo e së dielës është diçka krejt tjetër.
“Shpresojmë të jetë një ditë e madhe për të gjithë. Ne nuk duam vetëm ta luajmë, duam ta fitojmë”.
“Është një ndeshje e madhe, por edhe pjesa tjetër e muajit është e rëndësishme. Do të bëjmë atë që kërkon Real Madridi – të fitojmë dhe të luajmë mirë për të gjithë madrilenët”.
Mbappe ka shënuar 15 gola për Real Madridin në sezonin 2025–26, duke mos gjetur rrjetën vetëm ndaj Mallorcas dhe Juventusit. Francezi kishte një seri prej 11 ndeshjesh radhazi me gola për klubin dhe kombëtaren para se ajo të ndërpritej kundër Juventusit.
Një fitore në “El Clasico” do ta çonte Real Madrid pesë pikë përpara në krye të renditjes së La Ligës në hyrje të nëntorit, duke i dhënë gjithashtu skuadrës së Xabi Alonsos një injeksion të madh besimi përpara udhëtimit në “Anfield” më 4 nëntor.
