Scott McTominay po kalon një sezon të jashtëzakonshëm me Napolin, duke u shndërruar në një nga protagonistët kryesorë të Serisë A. Eleganca, forca fizike dhe personaliteti i kanë mundësuar skocezit të jetë vendimtar edhe në një kontekst taktik krejt ndryshe nga më parë, duke bërë diferencën pavarësisht emergjencave të shumta në skuadër.
Ndeshja në San Siro kundër Interit tregoi të gjitha cilësitë unike të McTominay-t. Dy gditjet e tij vendimtare, që çuan në golat e barazimit (1-1 dhe 2-2), janë shembullore: gjithmonë në vendin e duhur në momentin e duhur, me saktësi kirurgjikale dhe kohëzgjatje perfekte. Këto momente përmbledhin gjithçka që e bën McTominay-n një kampion: forcë fizike, prezencë konstante, aftësi për të parashikuar zhvillimin e aksionit dhe vendosmëri absolute.
Nga pikëpamja statistikore, deri tani McTominay ka shënuar 5 gola në kampionat, prej të cilëve 3 pikërisht kundër Interit, një kundër Veronës dhe një kundër Sassuolos. Në Ligën e Kampionëve ka shënuar edhe 3 herë, përfshirë një ‘dopietë’ ndaj PSV Eindhoven-it dhe një gol ndaj Qarabag-ut. Edhe pse ritmi i realizimeve është pak më i ulët se sezonin e kaluar, pesha e tij në lojën e skuadrës mbetet e jashtëzakonshme.
Antonio Conte ka ditur ta valorizojë McTominay-n në role të ndryshme, duke e përshtatur me përgjegjësi të reja taktike: që në fillim të sezonit ai ka mbuluar mungesat e Kevin De Bryne-s dhe Romelu Lukakut, duke e shndërruar skocezin në një lojtar shumëfunksional. McTominay luan si larg portës, me ndërhyrje mbrojtëse fantastike, ashtu edhe në 20 metrat e fundit të fushës, ku gjatësia e tij (1,91 m) bëhet armë e fuqishme në lojën ajrore, pa humbur saktësinë në prekje të ulëta. Kjo aftësi për t’u përshtatur i ngjan, në mënyrë moderne, fleksibilitetit dhe shkathtësisë së mesfushorëve historikë si Johan Neeskens te Holanda e famshme e viteve ’70.
Kur mbërriti në Itali, disa kishin dyshime për blerjen e tij, që kushtoi 32 milionë euro nga De Laurentiis me kërkesë të Conte-s, veçanërisht sepse lojtarët britanikë rrallë kanë lënë gjurmë të thella në Serinë A. McTominay i ka zhdukur të gjitha pasiguritë: ka humbur vetëm një ndeshje për arsye parandaluese dhe ka dhënë gjithmonë maksimumin, duke fituar zemrat e tifozëve napolitanë me përkushtim dhe pasion.
Performanca kundër Interit është tipike: pas humbjes së topit që solli 1-0, ai reagoi menjëherë me ‘dopietë’ vendimtare, duke konfirmuar rolin e tij udhëheqës dhe duke konsoliduar titullin virtual të lojtarit më të mirë të Serisë A. McTominay nuk është vetëm një mesfushor: ai është shpirti i Napolit, i aftë të ndikojë në çdo fazë të lojës dhe të udhëheqë skuadrën drejt objektivit të Scudettos.
Me klas, forcë dhe inteligjencë taktike, skocezi vazhdon të tregojë pse, sot, konsiderohet lojtari më i plotë dhe më vendimtar i kampionatit italian.
