Pas ekipit të parë, edhe ai U19 i Vllaznisë nuk ia ka dalë të fitojë në finale dhe të shpallet kampion i vendit. Në takimin e luajtur mesditën e sotme në stadiumin “Niko Dovana” të Durrësit, kuqeblutë janë mundur me rezultatin 1-2 nga Shkëndia e Tiranës.
Në fakt kanë qenë ata që kanë shënuar të parët, pikërisht në minutën e 20-të me anë të mesfushorit Kulla. Por në fundin e kësaj pjese ka qenë Ajazi që ka barazuar shifrat dhe me rezultatin 1-1 do të mbyllej 45 minutëshi i parë.
Po ky futbollist do të shënonte në minutën e 51-të edhe golin e dytë për Shkëndinë ndërkohë që më pas Vllaznia nuk i ka ndalur përpjekjet e saj për të barazuar por në minutën e 77-të Qardaku për simulim është ndëshkuar me kartonin e dytë të verdhë dhe për rrjedhojë me të kuqin duke e lënë skuadrën e tij më një futbollist më pak.
Kjo ia vështirësoi punën kuqebluve që u detyruan të pajtohen me humbjen duke bërë që pas dy suksesesh rradhazi, ta dorëzojnë titullin e tretë kampion.
© shkodrasport.com
