Mjafton kjo foto dhe bindesh fare lehtë për rëndësinë që kanë doktorët edhe në futboll. Jo më kot, prej vitesh ato janë pjesë e stafeve teknike.
Në këtë foto të shkrepur nga fotografi i “Shkodra Sport” Mikel Thepina gjatë ndeshjes së djeshme Vllaznia- Besëlidhja, janë sëbashku stafi mjekësor i Vllaznisë dhe i Besëlidhjes.
Ka qenë një moment i lojës në pjesën e dytë, kur portieri shkodran i Besëlidhjes Bajri bëri një ndërhyrje të guximshme duke mos lejuar Krujën të shënonte në portën e tij, por në momentin e rënies në tokë mesa duket ka përdredhur keq këmbën e tij.
Menjëherë në fushë ka hyrë doktori i Besëlidhjes Denis Fasllia por duke parë se situata serioze, në ndihmë të tij menjëherë kanë shkuar edhe doktori i Vllaznisë Zyhdi Çoba dhe fizioterapisti Ilirjan Haxhaja. Të tre sëbashku janë munduar ta kthejnë në normalitet këmbën e Bajrit dhe ndonëse ai ka ndjerë dhimbje, e ka vazhduar lojën deri në fund.
Kjo foto është në momentin, kur tre doktorët po i drejtohen pankinave respektive. Misioni i tyre u krye me sukses, ashtu si në shumë raste të tjera dhe jo më kot, duhet një falenderim edhe për ta për punën që bëjnë sepse janë pjesë e rëndësishme e futbollit.
© shkodrasport.com
