Teuta ka mbyllur dje përgatitjet për takimin e radhës në kampionat ndaj Egnatias, që luhet sot në orën 15:00 në stadiumin e Rrogozhinës.
Ashtu si edhe ishte parashikuar, të besuarit e trajnerit Bledi Shkëmbi mbyllën përgatitjet me një seancë taktike, ku u provua edhe formacioni që do të zbresë në fushë.
Sulmuesi i krahut, Lorenco Vila, i cili pësoi një dëmtim në kokë në takimin e Kupës ndaj Luzit në mesjavë, ia ka dalë të riaftësohet në kohë dhe do ta nisë nga minuta e parë ndaj Egnatias.
E vetmja mungesë do të jetë ajo e qendërmbrojtësit Harallamb Qaqi, i cili vijon terapinë riaftësuese pas dëmtimit që pësoi pak javë më parë.
Atmosfera në grup është pozitive dhe shpresohet se sot do të arrihet fitorja e parë sezonale.
Teuta në këto javë nuk ka marrë as një fitore të vetme, duke bërë një nga nisjet më të dobëta të kampionateve.
