Kualifikueset e Kupës së Botës për një përfaqësuese janë vënë në dyshim pasi skuadra e tyre nuk u paraqit në një ndeshje.
Ndeshjet kualifikuese për Kupën e Botës po zhvillohen në mbarë botën gjatë pushimit ndërkombëtar të tetorit, përfshirë edhe ato afrikane.
Guinea Ekuatoriale kishte të planifikuara dy ndeshje kualifikuese këtë muaj, ndaj Malavit dhe Liberisë. Por ndeshja e Guinesë Ekuatoriale kundër Malavit e planifikuar për të enjten u anulua pasi lojtarët nuk u paraqitën në ndeshje.
Sipas gazetarit të futbollit afrikan, Mickey Jnr, fillimisht kishte tensione mes lojtarëve të Guinesë Ekuatoriale, federatës dhe qeverisë, por këto çështje ishin zgjidhur.
Megjithatë, lindën probleme të tjera që bënë që lojtarët të vendosin të mos udhëtonin drejt Malavit. Mickey Jnr pretendon se problemi kryesor ishin ndërlikimet e papritura në udhëtim. Lojtarëve iu komunikua të mërkurën në mbrëmje se do të udhëtonin për në Malavi të enjten në mëngjes.
Megjithatë, pas mëngjesit, lojtarët e Guinesë Ekuatoriale u informuan se fluturimi ishte shtyrë për në pasdite, çka do të thoshte se ata do të mbërrinin pak para fillimit të ndeshjes, pa kohë për pushim. Ata pritej të ndërronin rrobat në avion dhe të shkonin direkt nga aeroporti në stadium.
Sipas raportit, lojtarët e Guinesë Ekuatoriale “refuzuan” këtë plan dhe thirrën një mbledhje, ku vendosën të mos udhëtonin në këto kushte.
Si rezultat, ndeshja u anulua dhe kjo iu komunikua Malavit gjatë drekës. Guinea Ekuatoriale do të rifillojë fushatën kualifikuese të hënën, kur do të presë Liberinë. Ata janë të përkushtuar të zhvillojnë këtë përballje, pas mungesës në ndeshjen kundër Malavit./Telegrafi/
