Eksperienca me Eros Grezdën në vitin e tij të parë te Rejnxhërs nuk shkoi ashtu siç pritej, por Stiven Xherard nuk heq dorë nga talenti i futbollistëve shqiptarë dhe po mendon të afrojë të tjerë në radhët e klubit të mirënjohur skocez. Duket se ai ka piketuar që tani talentin e radhës, një lojtar i cili ndryshe nga Grezda i ngjan më shumë për tipare loje ish-kapitenit legjendar të Liverpulit.
Sipas mediave në Skoci, Xherard ka aprovuar planin për mesfushorin e talentuar Albert Raqi si një prej emrave që duhen afruar në akademinë e Rejnxhers e për t’u mbajtur në monitorim nga ekipi i parë.
Bëhet fjalë për një djalosh i cili që në moshën 15-vjeçare debutoi në këtë edicion me Shqipërinë U17 dhe vlerësohet si një prej talenteve më të mëdha shqiptare në qarkullim me një të ardhme të sigurt.
Raqi u bë një vit më parë pjesë e akademisë së Totenhem dhe paraqitjet e mesfushorit të qendrës atje kanë tërhequr vëmendjen e skautëve të Rejnxhërs. Ai shihet si një talent i jashtëzakonshëm që mund të shfaqë vlerat e tij shumë shpejt edhe në ekipin e parë, ku Xherard nuk ka ngurruar t’u japë hapësira edhe 17-vjeçarëve, për të treguar se beson shumë te të rinjtë.
Palët janë në negociata dhe në ditët në vijim pritet të mësohet më shumë rreth të ardhmes së futbollistit të talentuar të Shqipërisë U17. /vipsport/
