Sot futbolli shqiptar do jetë sërish në aktivitet dhe kësaj rradhe në kuadër të raundit të 1/8 të kupës së Shqipërisë. Sipas shortit Vllaznia do ndeshet me ekipin e Pogradecit në transfertë në orën 14:00.
Kuqeblutë pasi eleminuan Labërinë e liqenorët pasi nxorrën nga gara Besën, do përplasen mes tyre për një vend në çerekfinalen e kupës.
Ndeshjet me Pogradecin nuk janë të shumta në historinë e shkodranëve. Kështu Vllaznia rikthehet në qytetin juglindor pas 6 vitesh, ku për herë të fundit ka luajtur në datën 16.09.2015 për raundin e dytë të kupës së Shqipërisë kundër Pogradecit. Takimi do përfundonte në shifrat 1-1 ku për kuqeblutë shënonte Mohamed Kdouh e për vendasit në fund barazonte Çekiçi.
Vllaznia do arrinte të fitonte në ndeshjen e kthimit me shifrat 4-0 dhe do arrinte të kualifikohej për më tej. Një tjetër ndeshje që ka mbetur në memorie nga transfertat e pakta në Pogradec është ajo humbje e datë 06.04.2012 ku Vllaznia mposhtej 2-1 për javën e 20-të të Superligës.
Historiku i këtyre dy ekipeve nuk është i pasur mes tyre dhe sot pritet që për Vllazninë të mos jetë edhe aq e vështirë. Kjo duke parë edhe diferencat mes dy skuadrave, ku edhe pogradecarët nuk kanë ambicie të mëdha në kompeticionin e kupës.
Endri ÇINARI
