Vllaznia U19 ka fituar me përmbysje ndaj Dinamos dhe është ngjitur në vendin e tretë të renditjes. Ndeshja në mes këtyre dy skuadrave është luajtur mesditën e sotme në fushën sportive “Reshit Rusi” dhe është fituar nga kuqeblutë e drejtuar nga trajneri Edmond Doçi me rezultatin 3-1.
Por duhet thënë se ka qenë një fitore aspak e lehtë për t’u arritur. Në minutat e para të saj portieri Alevio Ndoj pas përplasjes me një kundërshtar dëmtohet dhe detyrohet të largohet nga fusha duke i lënë vendin Gerbetit.
Ky i fundit do të ndëshkohej në ’30 nga një pakujdesi dhe Ramazani do të shënonte në portën shkodrane. Në minutat shtes të pjesës së parë, portieri mik Dardabella do të ndëshkohej me karton të kuq dhe kjo do ta ndryshonte tërësisht rrjedhën e lojës.
Në pjesën e dytë, Vllaznia U19 përfiton nga epërsia numerike dhe në minutën e 66-të Erman Pishtari do të barazonte shifrat. Nëntë minuta më vonë, Gerison Zhuri do të jepte një asist për Gerald Kubazin dhe ky i fundit nuk heziton të shënojë dhe ta kalojë në avantazh ekipin shkodran.
Megjithatë një minutë para fundit do të ishtee vetë Gerison Zhuri ai që do të shënonte edhe golin e tretë dhe në këtë mënyrë i gjithë takimi do të mbyllej me fitoren 3-1 të Vllaznia U19. Pas kësaj ndeshje, ajo është ngjitur në vendin e tretë me 15 pikë dhe sheh për më lart, por ndërkohë fillimisht duheet të mendojë për finalen e “Super Viareggio Cup” që do të luajë të enjten ndaj Genoa-s.
Burimi: Gazeta “Shkodra Sport”
