Vllaznia ka qenë një kantier ndërtimi në këtë merkato verore. Kjo pasi lëvizjet në hyrje e në dalje kanë qenë të shumta tek shkodranët. Po ashtu u ndërrua edhe trajneri, duke vendosur në krye Migen Memellin. Kjo për të ndërtuar një filozofi të re tek skuadra. Megjithatë ende merkato në hyrje nuk mund të quhet e përfunduar.
Kjo pasi një mesfushor do kompletonte rozën kuqeblu dhe emri më i lakuar dhe më afër Vllaznisë është ai i Ardit Krymit. Por lëvizje pritet të ketë edhe në dalje sërish dhe kjo kryesisht tek të rinjtë. Drejtuesit kanë kthyer vëmendjen tek elementi i ri që në sezonin e shkuar.
Ku emra si Alivoda dhe Smajli arritën të spikatnin në Superiore dhe të ishin një zbulim. I njëjti besim pritet sërish për të rinjtë edhe këtë sezon, por për disa prej tyre mund të ketë huazime.
Kjo për t’iu dhënë minutat e duhura në futbollin profesionist dhe të mos jenë thjesht pjesëmarrës në skuadrën shkodrane. Ekipe të ndryshme nga Kategoria e Parë apo edhe Superliga janë të interesuar për disa nga elementët e shkodranëve. Por tek kuqeblutë nuk duan të heqin dorë përfundimisht nga lojtarë që mund të vlejnë shumë në të ardhmen.
Kështu që formula e huazimit e disa futbollistëve për të marrë minutat e duhura, do ishte pozitive për të gjithë. Gjithsesi kjo mbetet për tu parë, pasi fillimisht duket se trajneri Memelli iu ka lënë të gjithëve mundësinë për të treguar vlerat e tyre për Vllazninë.
Endri ÇINARI
