Nje nga emrat me te njohur te basketbollit shkodran dhe atij shqiptar te gjithe ketyre viteve te fundit, Herion Faslija, sot ka vendosur qe perfundimisht t’i jape lamtumiren ketij sporti
I penalizuar nga nje demtim para nje viti, ai qendroi larg parketit dhe tashme eshte rikuperuar plotesisht, megjithate ai nuk e ka nder mend te vazhdoje me karrieren si sportist, pasi tashme ka nisur pune si trajner moshash. Vendimi per t’u larguar nga sporti duket se ka qene i dhimbshem, por i duhuri per te. Ate e ka bere te ditut vete Faslija permes nje postimi ne rrjetet sociale ku shkruan:
“Të nderuar miqt e mi!
Basketbolli është sporti në të cilin jam mbështetur prej 21 vitesh dhe do vazhdoj të mbështetem në të, gjithë jetën time, shkak i pasionit dhe dëshirës së madhe për t’a luajtur e praktikuar.
Në Nëntor të vitit 2021, ndodhi që të dëmtohem papritur në sy gjatë një ndeshjeje miqsore. Ky dëmtim më mori pothuajse një vit angazhim për t’i dhënë zgjidhje. Pritshmëritë e mia në raport me mbështetjen në këtë situatë dhe kohë qenë më të larta, duke marrë në konsideratë 21 vite kontribut, pa asnjë shkëputje (përveç 8 muaj ndërmjet tyre, shkak i një dëmtimi të rëndë në gju). Megjithatë, Zoti, siç dërgon sëmundjen, po njësoj kujdeset dhe për ilaçin. Dhe falë Tij, sot jam shumë më mirë.
Fotoja e mësipërme daton në ditën e dëmtimit në sy, ditë e cila në fakt, shënon kontributin tim të fundit si lojtar në sportin e Basketbollit.
Jam shumë i lumtur që kam qenë pjesë e këtij rrugëtimi shumëvjeçar me gjithë çka patur brenda. Rrëzime dhe ngritje të vazhdueshme, të cilat i kanë shërbyer vetëm ecjes përpara.
Sot, më shumë se kurrë, edhe pse në një formë shumë të mirë fizike dhe i ftuar nga disa ekipe për t’u bërë pjesë e tyre, jam i gatshëm të dorëzoj stafetën time brezit të ri, të ardhmes së basketbollit shkodran dhe atij shqiptar.
I vetëdijshëm që, e ardhmja do ketë sërish sfida, por asnjë e cila nuk mund tejkalohet apo fitohet. Brezi i ri mund të ketë fatin që të përballet me një panoramë akoma më pozitive se e kaluara, shkak i njohjes dhe eksperiencës së brezit tonë.
Pasioni dhe puna, të mishëruara me sinqeritet dhe seriozitet, janë themelet në të cilat kam mbështetur të gjithë karrierën time sportive. Këto themele, do i mbajnë dyert hapur për brezin e ri në çdo kohë.
Falenderues për çdo suport të pakursyer, për familjen dhe miqt, dhe në veçanti për tifozët shkodranë, të cilët janë burimi më i lartë i adrenalinës së çdo sportisti që ka veshur fanelën e Vllaznisë.
Me respekt,
Herion Faslija
