✍️ Shkruar nga Endri ÇINARI
Lirim Kastrati ishte një nga afrimet e bujshme të Vllaznisë në merkaton e dimrit, me kuqeblutë që surprizisht siguruan shërbimet e një futbollisti me një CV të shkëlqyer. Ku kosovari kishte milituar më parë në gjigandë si Dinamo Zagreb apo Legia Varshavë, duke mos harruar edhe aktivizimet me Lokomotivën e Zagrebit dhe Videoton në Hungari. E një sulmues që gjatë karrierës së tij kishte kapur një vlerë kartoni prej 2 milionë eurosh dhe pritej si lojtari që do bënte diferencën në Superiore.
Realisht pas marrjes optimale të formës fizike, ku 26-vjeçari vinte nga një dëmtim, ai u adoptua menjëherë me Vllazninë dhe kampionatin shqiptar. Duke dhuruar një nivel të lartë loje, ashtu siç pritej fillimisht nga numri “7-të” i shkodranëve. Madje duke fituar në dy raste edhe çmimin si futbollisiti i ndeshjes, ku ka spikatur me performancat e tij. Por, në javët e fundit duket se “shkëlqimi” i Kastratit ka rënë dhe kjo ka ndikuar edhe tek loja e 9 herë kampionëve të vendit në fazën ofensive.
Kjo si pasojë e rolit që po mbulon Kastrati, ku në skemën 3-5-2 që aplikon Martini, ai përdoret si një futbollist i linjës së djathtë. E në këtë mënyrë duke u limituar në maksimum në veprimet sulmuese pasi futbollisti konsumohet shumë duke ndihmuar skuadrën në prapavijë. Por, humbet cilësi në daljet e tij përpara, në një rol që nuk është më i miri për të. Pavarësisht se Kastrati ka dhuruar një nivel të kënaqshëm edhe si anësor i djathtë.
Megjithatë për të shikuar aftësitë reale të 26-vjeçarit, atij i duhet një rol më afër portës, pasi Kastrati ka shënuar vetëm një gol deri më tani edhe ai i ardhur me penallti kundër Tiranës. Në vijim të kampionatit roli i Kastratit në fushë pritet të rishikohet, ku edhe ekspertë të ndryshëm të futbollit janë shprehur se për të shikuar Kastratin e vërtetë, sulmuesi duhet të jetë afër portës dhe pjesë e fazës ofensive të skuadrës.
Burimi: Gazeta “Shkodra Sport”
