Shkruar nga Endri ÇINARI
Vllaznia ka pasur një ecuri jo shumë pozitive në fazën e dytë të kampionatit, ku shkodranët kanë marrë vetëm një fitore nga 8 ndeshje të luajtura në këtë fazë. Në këtë mënyrë duke u spostuar momentalisht në vendin e katërt të renditjes dhe tashmë në ndjekje të kryesuesve Egnatia dhe Elbasani. E ndërsa faza do mbyllet me duelin ndaj Flamurtarit, ku të besuarit e Martinit do kërkojnë pikët maksimale.
Dhe pikërisht ndaj vlonjatëve nisi edhe forma me luhatje e 9 herë kampionëve të vendit tonë. Kjo pasi ai duel i javës së 9-të të fazës së parë i zhvilluar në Vlorë përfundoi me shifrat 1-0 në favor të kuqezinjëve falë një goli të shënuar nga Herald Marku. Nga ai moment për kuqeblutë janë luajtur edhe 8 ndeshje të tjera, ku Vllaznia ka fituar vetëm një kundër Dinamos në shifrat 1-0 në javën e 11-të të kampionatit.
Ndërsa gjatë kësaj periudhe shkodranët njohin edhe 5 barazime dhe dy disfata ndaj skuadrave si Teuta me rezultatin 0-1 dhe Elbasani po ashtu 1-0.
E nga Flamurtari sërish tek Flamurtari për Vllazninë, ku në momentin e parë nisi momenti “jo” për Vllazninë pas asaj humbjeje në Vlorë. Teksa kësaj rradhe tek kuqeblutë kërkojnë të ndryshojnë “kursin” duke nisur nga ky takim i këtij fund viti. Ku përballë tifozëve të saj, Vllaznia do kërkojë vetëm fitoren dhe 3 pikët kundër Flamurtarit. Kjo për t’i bërë një mbyllje pozitive vitit 2025 e po ashtu rikthyer humorin pozitiv tek kuqeblutë e gjithashtu edhe për vetë objektivat që ka skuadra këtë sezon.
Ku vetë drejtori Sinani apo edhe kapiteni Balaj në një dalje mediatike së fundmi konfirmuan se ambiciet e ekipit ngelin maksimale dhe synimi i tyre i vetëm është gara për titullin kampion deri në javën e fundit të edicionit.
Burimi: Gazeta “Shkodra Sport”
