Një episod i veçantë ka tërhequr vëmendjen pas finales së Superkupës së Spanjës 2026, të fituar nga Barcelona me rezultatin 3-2 ndaj Real Madridit. Protagonist kësaj here nuk ishte një gol apo një rast i humbur, por një gjest i qartë i Kylian Mbappé-së gjatë ceremonisë së ndarjes së medaljeve.
Pasi mori medaljen e vendit të dytë, sulmuesi francez u kthye nga shokët e skuadrës dhe u bëri shenjë që të largoheshin nga fusha dhe të drejtoheshin menjëherë drejt dhomave të zhveshjes. Ndërsa disa lojtarë të Real Madridit qëndruan ende në fushë gjatë festës së Barcelonës së drejtuar nga Hansi Flick, Mbappé zgjodhi të mos jetë pjesë e atij momenti, duke përshpejtuar daljen e ekipit dhe duke shmangur shikimin e ceremonisë përmbyllëse të kampionëve.
Skena u zhvillua menjëherë pas protokollit tradicional të “korridoreve” mes dy skuadrave dhe u interpretua nga shumëkush si shenjë zhgënjimi dhe mentaliteti konkurrues e francezit, i cili e përjetoi rëndë humbjen në një finale tjetër.
Mbappé kishte mbërritur në Xheda me probleme në gju dhe kishte zhvilluar vetëm një stërvitje para finales. Megjithatë, ai u aktivizua në minutat e fundit, duke qëndruar në fushë për rreth 14 minuta. Gjatë kësaj kohe, ai tregoi disa shkëndija cilësie, përfshirë një pasim në thellësi për Arda Güler, që krijoi një nga rastet më të pastra për Realin dhe që mund ta kishte ndryshuar rrjedhën e ndeshjes.
Kjo ishte finalja e tretë për Mbappé-në me fanellën e Real Madridit dhe, ashtu si në finalen e Kupës së Mbretit 2025, ai u detyrua të kënaqej me rolin e zëvendësuesit dhe me një tjetër humbje të hidhur.
