Shkruar nga Endri ÇINARI
Deri në javën e 29-të të sezonit 2025-26, Vllaznia ka konfirmuar dominimin e saj në fushën e lojës sulmuese, duke u renditur si ekipi që ka shënuar më shumë gola në Superiore. Me 36 rrjeta të realizuara, kuqeblutë kanë lënë pas rivalët kryesorë, Elbasanin me 35 gola dhe Egnatian me 34, duke treguar se sulmi shkodran nuk njeh rivalitet kur bëhet fjalë për produktivitetin ofensiv.
Ajo që bën përshtypje në skuadrën e drejtuar nga trajneri Martini është shpërndarja e golave thuajse në gjithë ekipin. Janë plot 12 futbollistë të Vllaznisë që kanë gjetur rrugën e rrjetës gjatë këtij sezoni, një tregues i qartë i forcës kolektive dhe i një sulmi të larmishëm që nuk varet nga një ose dy emra të vetëm.
Golashënuesi më i mirë i ekipit dhe i kampionatit deri tani mbetet Bekim Balaj me 13 gola, duke demonstruar klasin e tij si sulmues kryesor. Pas tij, Kallaku ka kontribuar me 5 gola, ndërsa Mala dhe Jago kanë shënuar nga 3 herë secili, duke treguar se skuadra ka alternativa të shumta për të rrezikuar portën kundërshtare.
Por lista nuk mbaron këtu: Bismark dhe Kastrati kanë shënuar nga 2 gola secili, teksa Bajrami, Gurishta, Tafili, Dodaj, Hakaj dhe Murataj kanë kontribuar me nga një gol. Ky fakt është tregues i një skuadre që luan për ekipin dhe që ka shumë lojtarë të aftë të bëjnë diferencën në çdo moment të ndeshjes.
Gjithashtu, për të plotësuar totalin e 36 golave, Vllaznia ka përfituar edhe nga dy autogola kundërshtarë, të regjistruar në ndeshjet e fituara 0-1 ndaj Bylisit dhe 3-1 ndaj Tiranës. Kjo tregon se presioni dhe iniciativa e vazhdueshme e kuqebluve shpesh e detyrojnë kundërshtarin të bëjë gabime që përfitojnë shkodranët.
Me një formë të tillë sulmuese dhe një shpërndarje të gjerë të golashënuesve, Vllaznia duket e vendosur të luftojë për titullin dhe të mbajë frenat e lojës në kampionat. Ky sezon po tregon se ekipi shkodran nuk është vetëm protagonist në tabelë, por edhe një shembull i lojës kolektive dhe i efikasitetit në sulm.
