Shkruar nga Endri ÇINARI
Nëse në repartin ofensiv Vllaznia vijon të ketë nevojë për ndërhyrje në merkato, e njëjta gjë nuk mund të thuhet për mesfushën. Aktualisht, ky repart duket më i kompletuari në skuadrën e drejtuar nga Edi Martini, me kuqeblutë që kanë alternativa të shumta në pothuajse çdo pozicion. Konkurrenca për një vend në formacion pritet të jetë shumë e fortë, ndërsa trajneri do të ketë mundësi zgjedhjeje sipas kundërshtarit dhe skemës së lojës.
Në krahun e djathtë, Vllaznia ka dy alternativa cilësore. Patrik Bardhi, një nga afrimet e merkatos verore, pritet të rivalizojë me Brajkoviçin për një vend titullari. Po ashtu, në këtë repart pritet të rikthehet edhe Lirim Kastrati, i cili vazhdon fazën e rikuperimit nga dëmtimi. Me rikthimin e tij, konkurrenca në këtë pozicion do të bëhet edhe më e fortë.
Edhe krahu i majtë ofron zgjedhje të shumta për stafin teknik. Emiljano Musta dhe Avdyli, të dy të afruar gjatë kësaj vere, janë kandidatët kryesorë për këtë rol dhe kanë treguar se mund të japin garanci në të dyja fazat e lojës. Prania e tyre i jep Vllaznisë më shumë ekuilibër dhe mundësi rotacioni gjatë sezonit të gjatë.
Në qendër të mesfushës, Drosi dhe Qato mbeten dy nga emrat më të rëndësishëm të skuadrës, ndërsa afrimi i Kobiljarit nga Tirana ka rritur ndjeshëm cilësinë në këtë repart. Përveç tyre, trajneri Martini ka në dispozicion edhe Herald Markun, Tafilin dhe Muratajn, futbollistë që ofrojnë karakteristika të ndryshme dhe rrisin alternativat në çdo ndeshje.
Pikërisht për këtë arsye, mesfusha konsiderohet aktualisht reparti më i kompletuar i Vllaznisë. Megjithatë, merkatoja verore mbetet ende e hapur dhe drejtuesit kuqeblu nuk përjashtojnë mundësinë e një tjetër afrimi, nëse paraqitet një mundësi e favorshme në treg. Për momentin, gjithsesi, është pikërisht konkurrenca në mesfushë ajo që i jep më shumë qetësi stafit teknik në prag të nisjes së kampionatit.
