Ante Aralica ishte një ndër lojtarët më të mirë të ndeshjes Vllaznia-Partizani. Ai ka shënuar në ndeshjen e djeshme golin e barazimit, teksa sulmuesi kroat mposhti me një goditje Alban Hoxhën, i ndihmuar edhe nga një devijim i Bitrit.
Në fakt, te Vllaznia kanë kohë që presin të shohin Ante Aralicën e vërtetë, i cili duket se gradualisht po rritet nga ditë në ditë, teksa në ndeshjen e djeshme ndaj Partizanit, dha të tjera konfirmime.
Pas disa golash, Aralica shënoi ndaj të kuqve të kryeqytetit, duke u bërë edhe një ndër golashënuesit më të mirë për Vllazninë së bashku me Latifin, me plot 11 realizime të dy, në kampionat dhe Kupë së bashku.
Në golin e djeshëm, sulmuesi 25-vjeçar mposhti portierin Hoxha, teksa lëshoi një të djathtë perfekte nga brenda zonës dhe për të përshëndetur për herë të parë rrjetën e Alban Hoxhës, i ndihmuar edhe nga një devijim i Bitrit.
Krahas golave, Aralica u dallua edhe për pjesëmarrjen shumë aktive në lojën e kuqebluve, duke marrë pjesë në disa aksione të rrezikshme.
Kujtojmë se, 25-vjeçari ka firmosur një kontratë që e lidh me kuqeblutë edhe për vitin e ardhshëm, teksa pa frikë mund të konfirmohet si një nga lojtarët bazë të Vllaznisë së sezonit tjetër, megjithatë çdo gjë mbetet për t’u parë në vazhdim.
Maringlen ZHIVANI
