FUTBOLL

Ndeshja Laçi- Vllaznia e vlefshme për javën e 19-të të Superligë shqiptare do të luhet ditën e dielë. Kjo është caktuar nga kalendari paraprak i Federatës Shqiptare të Futbollit teksa e ka lënë këtë takim për t'u luajtur në ditën e fundit të kësaj jave. Ndodh që edhe mund të ndryshojnë gjërat por gjasat janë që të mos ndodhë kështu. Edhe orari me shumë mundësi nuk do të ndryshojë, do jetë ora 14.00 për zhvillimin e saj. Në kushte të tilla, futbollistët e Vllaznisë nga dita e sotme do të nisin përgatitjet për këtë ndeshje.

Pjesën e dytë të ndeshjes me Bylisin e ka ndjekur mes tifozëve. Presidenti i Vllaznisë Agron Çela ka ndjerë emocionet e vërteta të një tifozi dhe ankthin për të pritur me padurim fundin e ndeshjes për të dëgjuar vërshëllimën përfundimtare të gjyqtarit që do t'i jepte fitoren e katërt Vllaznisë. I pyetur në lidhje me këto emocione, numri 1 i klubit shkodran do të shprehej: "U kisha premtuar tifozëve një ditë para ndeshjes se do ta shihja bashkë me to atë dhe kështu veprova, duke qenë njëri prej tyre në mbështetje të Vllaznisë për arritjen e një tjetër fitoreje".

Ka mjaftuar një 11-metërsh i shndërruar në gol nga ana e Kristian Dragoit për t'i dhënë fitoren në ndeshjen e sotme Vllaznisë ndaj Bylisit. Tre pikë shumë të vlefshme që e ngjisin këtë skuadër në kuotën e 29 pikëve duke qenë në kuotë të barabartë pikësh tashmë me Tiranën e vendit të pestë dhe vetëm 5 pikë larg Teutës së vendit të dytë. Ndeshja e luajtur pasditen e sotme në stadiumin "Loro Boriçi" ka dhuruar jo pak emocione. Sidomos pjesa e parë ka qenë shumë e bukur për Vllazninë që përveç golit të Dragoit, duhej të kishte shënuar edhe ndonjë gol tjetër.

Trajneri i Vllaznisë Artan Bushati në konferencën e shtypit të pasndeshjes së sotme me Bylisin, ka përmendur edhe vështirësinë që ka patur arritja e fitores megjithatë duke folur para gazetarëve ka thënë se fitorja e ekipit të tij nuk është vënë asnjëherë në dyshim. “Në këtë ndeshje kishim përballë një skuadër të mirë dhe e kishim të vështirë të merrnim një firore të tillë. Kundështari ishte I përgatitur në të gjithë aspektet dhe kjo na krijoj jo pak probleme në fushën e lojës. Në pjesën e parë arritëm të shënonim golin dhe të administronim më mirë lojën dhe mund të kishim marrë edhe një tjetër rezultat.

Skuadra kryesuese e kampionatit kombëtar të futbollit të femrave- Ada e Velipojës, ka arritur një tjetër fitore sot në kampionat. Në ndeshjen e luajtur ndaj ekipit të Kamzës, ajo ka arritur të fitojë me rezultatin e pastër 3-0. Ka qenë një takim i lehtë përgjithësisht teksa më shumë është zhvilluar një ndeshje kontrolli për të testuar veten në prag të sfidës shumë të rëndësishme të javës së ardhshme me Juban Danjën.

Ashtu si para ndeshjes me Kukësin, edhe këtë herë në pragndeshjen me Bylisin, ekipi i Vllaznisë do të grumbullohet një natë përpara. Për rrjedhojë pasditen e sotme pasi ekipi të ketë mbaruar seancën e fundit stërvitore, do të mblidhet në Grand Hotel "Europa" ku do të kalojë natën. Gjatë kësaj periudhe të qëndrimit aty, sigurisht që do ketë edhe një takim me presidentin Çela për të diskutuar në lidhje me këtë ndeshje. Ajo që vlen për këtë sfidë të rradhës sigurisht që është vetëm fitorja. Për ta arritur atë natyrisht që nuk do jetë e lehtë, përkundrazi do kërkohet përkushtim maksimal nga të gjithë futbollistët.

Një fitore shumë të thellë ka arritur pasditen e sotme ekipi i futbollit të femrave "Juban Danja". Ai ka luajtur në Kamëz ndaj ekipit të Dardanisë dhe ka fituar me rezultatin e thellë 7-0. Autore të golave në këtë ndeshje kanë qenë Klaudia Rrotani, Nora Selmani, Aurora Seranaj (2), Emanuela Jaku dhe Anela Vishkulli (2). Ndeshja sigurisht që ka qenë e dominuar në të gjitha drejtimet nga ekipi i drejtuar nga trajneri Kreshnik Krepi që e ka shfrytëzuar atë si një "nxemje" para ballafaqimit të javës së ardhshme me Adën.

Tjetër problem për Vllazninë. Përmbarimi gjyqësor ka mbërritur këto ditë në zyrat e klubit të futbollit Vllaznia. Arsyeja është vendimi për pagesën ende të papaguar të këtij klubi në adresë të ish-futbollistit të saj Suad Lici. Ky i fundit ka fituar gjyqin me klubin diçka më tepër se një vit më parë. Që atëherë, klubi shkodran nuk ia ka kaluar në numrin e tij të llogarisë shumën prej 31 mijë dollarësh që ai ka fituar në gjyq si pasojë e një mospagesës së kontratës të tij që në vitin 2005. Ka qenë Dhoma e Zgjidhjes së Konflikteve pranë FSHF-së që i pat dhënë të drejtë ish-futbollistit në vendimin e tij.