Një debat i madh ka ndodhur në studion e Procesit Sportiv sa i përket moviolës te Partizani-Tirana. Kështu Lorenc Jemini është shprehur se goli i barazimit nga të kuqtë ishte offside, por nuk ishte faji i kryesorit të takimit dhe ai meriton notë të lartë. Por këtë gjykim nuk e ka pranuar Sinemati.
Debati i plotë
Jemini: “Goli i parë i Partizanit ishte offside. Por këto derbi nuk gjykohen, por menaxhohen. Në atë rast kryesori nuk kishte pamje të qartë dhe normalisht ka gabuar. Pjesa tjetër ishte shumë e mirë për të dhe meriton një notë të lartë. Pastaj për treshen e arbitrave duhet ta ndajmë është pjesë tjetër”.
Sinemati: “Po si qenka pjesë tjetër kjo? Ne jemi mësuar që ia kalojmë fajet anësorit dhe e nxjerrim të pastër kryesorin. Kështu ka ndodhur gjithmonë. Po si mund të marri notë të lartë Jorgji aty? Po ti je ngelës për vete. Nuk e kuptoj këtë gjykim”.
Jemini: “Shiko se nuk ke informacione dhe po na kalon në disa tema tani që nuk po dalim dot. E përsëri edhe njëherë se notat ndahen në mënyrë personale te gjyqtarët. Jorgji ka bërë gjithçka mirë aty. Madje edhe te përleshja Trashi-Ngo që në fakt ishte për të kuq, por në derbi nuk jepet”.
Sinemati: “E përse nuk jepet në derbi kur ishte për dy kartonë të kuq. Çfarë është ky tjetërsim i gjykimit dhe qenka e drejtë?”.
Jemini: “Po sepse duhet ta mbash sa më mirë derbin dhe mos t’i heqësh bukurinë, prandaj në këtë rast janë falur dhe për mua kanë vepruar drejt”.
