Klubi i Burrelit ka gjetur shpejt trajnerin e ri për vijimin e këtij sezoni, pas dorëheqjes së teknikut Samuel Nikaj i cili e kishte drejtuar në sezonet e fundit. U përfol se një kandidat i fortë për këtë post ishte shkodrani tjetër Ergi Borshi, por drejtuesit matjanë në fund kanë bërë një zgjedhje ndryshe.
Nëpërmjet një postimi në rrjetet sociale është bëre e ditur se drejtimin e skuadrës do ta marrë një emër i njohur, Klevis Dalipi. 50-vjeçari, i cili ka eksperienca në klube të ndryshme në futbollin shqiptar, nuk ulej në pankinën e një skuadre që nga viti 2023, kur për herë të fundit drejtoi Lushnjën.
NJOFTIMI I BURRELIT
KLEVIS DALIPI, TRAJNERI I RI I KF BURRELIT!
KF Burreli njofton emërimin e Klevis Dalipit në krye të skuadrës verdheblu.
Trajneri i ri merr drejtimin e ekipit me objektivin për të rikthyer skuadrën te rezultatet pozitive dhe për të përballuar me ambicie sfidat e radhës.
Klubi i uron mirëseardhjen dhe shumë suksese në drejtimin e KF Burrelit!
