Egnatia do vizitojë sot Shkodrën për tu ndeshur me Vllazninë. Rrogozhinasit do kenë detyrën e vështirë për të marrë pikë në këtë javë të Superligës. Patjetër përballja me kuqeblutë nuk do ishte ajo që do donin në këto momente, por i tillë është kalendari. Kështu trajneri Zekerija Ramadani duket se ka projektuar edhe titullarët.
Në portë pritet si zakonshit Bruno Puja, i cili pavarësisht afrimit të një portieri brazilan tek rrogozhinasit, do jetë në katërkëndor kundër shkodranëve. Mbrojtja me Ymeralilajn djathtas, dyshen Krasniqi-Krivanjeva dhe Allmuçën në të majtë.
Mesfusha ka disa mungesa ku Eller e Telushi mungojnë prej dëmtimeve e Imeri për shkak të pezullimit. Në këtë repart pritet Iseni, Jackson dhe Shtubina. Nga krahët e sulmit në mbështetje të Maganit priten edhe Augusto dhe Ademi.
Kjo pritet të jetë edhe 11-tshja titullare e rrogozhinasve sot në orën 16:45 në “Loro Boriçi”. Një sfidë që pritet të dhurojë emocione duke parë nevojën për pikë të dy skuadrave.
Endri ÇINARI
