Mesfushorit kuksian Fjoart Jonuzi i ka përfunduar kontrata dy-vjeçare që ka patur me Vllazninë dhe për momentin, ai po shqyrton ofertat e tjera që kanë ardhur në drejtim të tij, teksa kuptohet që jo pak ekipe duan ta kenë në planet e tyre.
Në Shkodër i kanë ofruar një kontratë të re, teksa një gjë e tillë konfirmohet edhe nga burime të “Shkodra Sport” pranë skuadrës së Vllaznisë. Ndërkohë, poashtu ditën e djeshme, është folur që për këtë futbollist ka shfaqur interes edhe ekipi i Partizanit.
Për të mësuar diçka më shumë në lidhje me të ardhmen e Jonuzit, “Shkodra Sport” ka kontaktuar ditën e sotme me menaxherin e mesfushorit, Endri Muçmata, i cili ka dhënë një përgjigje të shkurtër për interesimin e Partizanit ndaj Jonuzit.
“Jonuzi te Partizani? Nuk ka asgjë zyrtare. Për momentin, janë vetëm fjalë”,-tha menaxheri i Jonuzit, Endri Muçmata.
Vetëm kaq, por pa sqaruar më shumë nëse do të diskutojnë më shumë për këtë ofertë apo do presë të mësojë edhe ofertat e tjera, që do të marrë nga ekipet e huaja jashtë Shqipërisë.
Fjoart Jonuzi është një mesfushor me të dhëna shumë të mira, teksa te Vllaznia ka treguar një formë shumë pozitive, duke patur edhe shumë vazhdimësi.
Maringlen ZHIVANI
