Shqipëria humbi përballë Norvegjisë në një ndeshje miqësore e cila u luajt në “Elbasan Arena” dhe që u mbyll me shifrat 0-1.
Futbollisti më i shtrenjtë i Kombëtares sonë, Elseid Hysaj u shpreh se ajo ishte vetëm një ndeshje ku mungoi forca fizike dhe ju bën thirrje tifozëve për t’i mbështetur pasi sipas tij, nuk ka asgjë për t’u shqetësuar.
Hysaj doli i dëmtuar nga ndeshja ndërkohë që tregon edhe se ka pasur shumë interesime për gjendjen e tij shëndetësore.
“Ishim pak poshtë fizikisht dhe kjo ishte gjëja që nuk na favorizoi por besoj që ndonjëherë ndodh të jemi poshtë por duhte të marrim veten.
Përgatitja nuk ishte e keqe por kur filluam të kërkojmë më shumë gabuam. Besoj se kemi bërë mirë në stërvitje dhe disa lojtarë të rinj e kanë marrë sensin e Kombëtares së madhe.
Nuk kishim fuqi të shkonim nga porta në portë por tifozët nuk duhet të shqetësohen pasi i kemi pasur pranë gjithmonë si në fitore si në humbje.
Kam marrë me qindra mesazhe dhe nuk më ka pushuar telefoni. Të gjithë më kanë pyetur në lidhje me dëmtimin”, u shpreh Hysaj për “Vip Sport”.
