Andi Hadroj me shumë mundësi po luan ditët e tij të fundit me ngjyrat e Partizanit dhe në ditët në vazhdim pritet që e ardhmja e tij të jetë jashtë vendit, në një kampionat më të fortë e më të pasur, ku në “pole” shihet të jetë Turqia.
Ndërkohë, klubi i kuq po punon që pasuesin e pukjanit ta sigurojë para largimit të tij, në mënyrë që t’i paraprihet gjithçkaje dhe të mos ketë vend për surpriza. Në tavolinën e “demave” janë dy emra dhe duket se diferencën e bëjnë paratë, por edhe preferenca e trajnerit Zekiç.
ALEKSANDËR TRUMÇI – 22-vjeçari është në pronësi të klubit të Bylisit, i shquar për bashkëpunimet me Partizanin në merkatot e shkuara. Të kuqtë gjatë kësaj vere kanë shfaqur interes për të riun, i cili mban edhe rolin e kapitenit të ballshiotëve.
Ai në sezonin e shkuar mungoi vetëm në 2 ndeshje me Bylisin në Superiore dhe paraqitjet e tij pozitive e renditën mes më të mirëve të linjës së djathtë, pavarësisht se Bylisi ra nga kategoria.
“Panorama Sport” mëson se në ditët e shkuara Partizani ka pasur bisedime konkrete me palën e lojtarit, që siç e ka treguar edhe publikisht, dëshiron të bashkohet me “demat”. Përfaqësues të klubit të kuq kanë gjetur akordin me Trumçin, teksa janë bërë edhe negociata me Bylisin për blerjen e kartonit.
Shifra e kërkuar nga Bylisi është 80 mijë euro, plus përqindje të kartonit, me Partizanin që ka rënë paraprakisht dakord. Megjithatë, duket se një “okazion” ka lënë pezull këtë operacion.
