Elseid Hysaj është nxjerrë jashtë listave të Lacios që në nëntor, pas dëmtimit që pësoi me Kombëtaren. Edhe pse ai u rikuperua shpejt nga dëmtimi, klubi bardhekaltër vendosi që të mbante lojtarin jashtë, duke lënë të kuptohet se për të nuk do të ketë hapësira, pasi është edhe në muajt e fundit të kontratës së tij me Lacion.
Por rregullorja e Serisë A i mundëson trajnerit Mauricio Sarri që t’i hapë përsëri dyert e ekipit Hysajt, qoftë edhe vetëm për një muaj. Gjatë merkatos, listat e lojtarëve janë të hapura e kësisoj, Hysaj ësht kthyer përsëri mes të grumbulluarve që në ndeshjen e parë të vitit 2026.
Emri i tij figuron në listën e lojtarëve të grumbulluar për duelin e sotëm në Serinë A, një sfidë shumë delikate pasi luhet përballë Napolit pretendent për titull. #
Kësisoj, Hysaj mund ta shohë veten përsëri në fushën e lojës në duelin ndaj ish-skuadrës, me një mundësi të mirë që të bindë klubin aktual të vazhdojë t’i besojë edhe përtej dritares së janarit duke e kthyer në listat zyrtare për kampionatin dhe kompeticionet e tjera.
