Alesandro Bastoni është në skadencë kontrate me Interin në verën e vitit 2024, por ndërkohë futbollisti dhe klubi i tij, edhe pse kanë nisur bisedimet prej kohësh, duket se janë shumë larg kundrejt një marrëveshjeje mes tyre.

“Unë jam nga ata menaxherë që nuk e kam çuar asnjë prej klientëve të mi në skadencë kontrate, prandaj mendoj se edhe me Bastonin do të ndodhë e njëjta gjë.

Pastaj, kur një futbollist pret shumë që të gjejë akordin, në shumicën e rasteve do të thotë se klubi nuk është i bindur totalisht për atë, kështu që është më mirë të ndërrojë ajër”, ishte deklarata e fundit e bërë nga menaxheri i mbrojtësit zikaltër, Tulio Tinti, i cili ka vënë me shpatulla pas murit menjëherë zikaltrit.

Aktualisht, diferenca mes kërkesës dhe ofertës është mbi 1 milion euro (Bastoni do 6 milionë në sezon, Interi i ofron 5 milionë si rrogë), por nga ana e futbollistit nuk kanë ndërmend që të lëshojnë dhe arsyet janë dy, Juventusi dhe Bajerni i Mynihut.

Klubi gjerman e ndjek Bastonin që në periudhën që Interi drejtohej nga Antonio Konte, por së fundmi edhe “zonja e vjetër” është hedhur në kundërsulm, me kapitenin e Italisë, Leonardo Bonuçi, që po bën mediatorin me lojtarin, për të marrë trashëgiminë e tij në Torino.