Komisioni i Disiplinës ka nxjerrë edhe vendimet për javën e 5-të të Superiores. Si Kukësi, por ashtu edhe Tirana ia hedhin paq me ngjarjen që ndodhi në “Elbasan Arena”, ku pati një përplasje të lojtarëve të të dyja skuadrave.
Bardheblutë dënohen me vetëm 1 milionë lekë të vjetra për sjellje të gabuar të tifozëve, kurse paralajmërohen Torasa dhe Musolli.
Kujtojmë që në fundin e ndeshjes mes Kukësit dhe Tiranës, që përfundoi me rezultatin 2-1 për verilindorët, pati një acarim nervash mes lojtarëve të të dyja skuadrave, nisur për një rivënie anësore.
Më tej, kur u dëgjua vërshëllima e fundit e kryesorit Eldorian Hamiti, futbollistëve iu drejtuan dhomave të zhveshjes, por në ambientet e brendshme të stadiumit ka pasur sërish një grindje mes lojtarëve, konkretisht Gavazajt dhe Torasës, por në këtë moment ka ndërhyrë sërish Musolli, i cili ka goditur pas shpine lojtarin e Tiranës.
Vendimet e Komisionit të Disiplinës:
1. KF “Tirana”, për sjellje të gabuar të spektatorëve të saj, në bazë të Nenit 65/2 dhe 65/4/a të KDS, dënohet me gjobë në masën 100.000 (njëqindmijë) lek.
2. Lojtari i KF “Tirana”, Agustin Torassa, në bazë të Nenit 12 të KDS, paralajmërohet se në rast përsëritje të shkeljeve disiplinore, do të jetë subjekt i masave që parashikon Kodi I Disiplinës Sportive dhe Rregulloret e tjera.
3. Lojtari i KF “Kukësi”, Besart Musolli, në bazë të Nenit 12 të KDS, paralajmërohet se në rast përsëritje të shkeljeve disiplinore, do të jetë subjekt i masave që parashikon Kodi I Disiplinës Sportive dhe Rregulloret e tjera.
4. Lojtari i KF “Teuta” U-19, Kledi Isaku, për provokim ndaj publikut, në bazë të Nenit 52 të KDS, dënohet me 2 (dy) ndeshje pezullim nga aktivitetet.
5. Lojtari i KF “Shkëndija” U-19, Ergi Ajazi, për sjellje jo sportive ndaj zyrtarit të ndeshjes, në bazë të Nenit 48/1/a të KDS, dënohet me 4 (katër) ndeshje pezullim nga aktivitetet.
6. Lojtari i KF “Besa” U-19, Gevi Madani, për sjellje jo sportive ndaj zyrtarit të ndeshjes, në bazë të Nenit 48/1/a të KDS, dënohet me 4 (katër) ndeshje pezullim nga aktivitetet.
7. Zyrtari i FC “Flamurtari” U-17, Robert Islamaj, për sjellje jo sportive ndaj zyrtarit kundërshtar, në bazë të nenit 47/2/a të KDS, dënohet me 3(tre) ndeshje pezullim nga aktivitetet.
Kundër vendimit lejohet ankim brenda 3 (tre) ditëve përpara Komisionit të Apelit.
