Merkatoja e janarit mund të ketë risi për Armando Brojën dhe të hapë skenarë të rëndësishëm për sulmuesin e Kombëtares shqiptare. Një prej tyre mund të jetë shumë e bujshme, pasi sipas mediave italiane, ai është piketuar nga Interi për një transferim në ditët e para të vitit 2024.
Gazeta më e njohur sportive italiane, ”La Gazzetta dello Sport”, ka analizuar situatën e zikaltërve dhe sidomos sa i përket repartit të sulmit. Lautaro Martinez dhe Turam po shkëlqejnë, ndërsa zëvendësuesit Arnautoviç e Sançez janë një dështim deri tani. Ndaj po mendohet ideja e largimit të të paktën një prej tyre, për afrimin e një tjetër sulmuesi.
Aleksis Sançez është emri më i mundshëm pasi për të ka interes nga Arabia Saudite, Nëse vjen oferta tunduese për lojtarin dhe një transferim i tillë realizohet, atëherë Interi do të hidhet në sulm për një emër tjetër në repartin e avancuar në janar. Në majë të listës është Mehdi Taremi i Portos, por klubi portugez nuk mendon ta lërë të lirë para fundit të sezonit. Ndaj opsione të tjera të mundshme janë Antoni Marsial i Mançester Juanjtid dhe pikërisht Armando Broja.
“Pastaj është Broja, shqiptari i Çelsit, i kthyer në fushë pas dëmtimit në gju. Në Londër nuk po gjen vazhdimësi dhe nuk është i lumtur me situatën, ja pse mund të largohet. Interi e monitoron. Në javën e fundit të janarit, ajo që sot mund të duket e pamundur, kthehet në një okazion. Në çdo repart, edhe në sulm”, shpjegon gazeta italiane, duke bërë të qartë se zikaltërit do të përpiqen të bëjnë një lëvizje për sulmuesin shqiptar.
