Sipas portalit ‘Defensa Central’, Luka Modrić po planifikon një rikthim te Real Madridi sapo të përfundojë karrierën si futbollist.
Mesfushori kroat 40-vjeçar, që aktualisht luan për Milanin, thuhet se ka marrë një ofertë personale nga presidenti Florentino Pérez për t’u rikthyer në Madrid ose si ambasador i klubit, ose si trajner në akademinë e të rinjve.
Modrić raportohet se është entuziazmuar nga ideja e punës me fëmijët dhe dëshiron të nisë karrierën e tij si trajner në qendrën stërvitore të Real Madridit në Valdebebas.
Megjithatë, para se të marrë një vendim përfundimtar, kroati planifikon të marrë një vit pushim për t’u çlodhur dhe për të kaluar më shumë kohë me familjen pas largimit nga Milani. Më pas, ai synon të ndjekë kurset e trajnerit, për t’u përgatitur për kapitullin e ri të jetës së tij.
Pavarësisht moshës, Modrić mbetet një figurë shumë e rëndësishme te Milani dhe vazhdon të tregojë performanca të nivelit të lartë. Klubi italian vlerëson lart lidershipin dhe profesionalizmin e tij.
Për momentin, ai është i përqendruar te Kupa e Botës 2026, ku dëshiron ta mbyllë karrierën me Kroacinë në mënyrën më të mirë të mundshme.
Pas këtij turneu, një rikthim te Real Madridi, në një rol të ri jashtë fushës, duket gjithnjë e më i mundshëm.
