Pas shumë kohësh mungese rikthehet në fushën e lojës dhe menjëherë shfaqet edhe si golashënues. E kemi fjalën për futbollistin gjermano- kongolez Christopher Mandiangu.
Ish- lojtari i ekipeve kombëtare të moshave të Gjermanisë, ka qenë i pafat në Shkodër. Gjatë fazës përgatitore ai është dëmtuar dy herë, ndërkohë që më pas ka rezultuar edhe pozitiv me covid-19 dhe si rrjedhojë ka qenë për shumë kohë larg skuadrës.
Por tashmë duket se kjo periudhë e vështirë është lënë pas dhe gradualisht është bashkuar me skuadrën. Madje në ndeshjen e sotme të Kupës ndaj Elbasanit, ai ka debutuar në një ndeshje zyrtare me fanellën kuqeblu.
Ka qenë minuta e parë e pjesës së dytë që ai ka zbritur në fushë duke zënë vendin e Imerit. Dhe Mandiangu ka bërë një prezantim përgjithësisht të mirë. Duke luajtur si sulmues krahu, ka qenë një rrezik i vazhdueshëm me lojën e tij.
Madje në minutën e 67-të pas një endje të topit në zonë, ai ka gjuajtur saktë me të majtën duke shënuar golin e pestë për Vllazninë.
Në këtë mënyrë, tashmë trajneri Brdariç do të ketë edhe një forcë më shumë për ndeshjet e ardhshme dhe kjo padyshim që është diçka pozitive./SHKODRA-SPORT.COM/
