Redon Xhixha pritet të jetë goditja më e rëndësishme e Tiranës në merkaton e janarit. Sulmuesi është shumë pranë një rikthimi te bardheblutë, ndërsa burime pranë klubit bëjnë me dije se negociatat kanë hyrë në fazën finale dhe palët janë drejt akordit përfundimtar.
Nëse gjithçka mbyllet sipas planit, Xhixha do të rikthehet në kryeqytet pas gati tre vitesh. Ai u largua nga Tirana në janar të vitit 2023 për të vijuar karrierën në Azerbajxhan me Karabakun, ku fitoi eksperiencë të vlefshme në aspektin profesional. Më pas, sulmuesi firmosi me CR Belouizdad, skuadër me të cilën ka zhvilluar 5 ndeshje, duke grumbulluar 117 minuta aktivizim.
Rikthimi i 25-vjeçarit shihet si një lëvizje strategjike nga drejtuesit bardheblu, të cilët synojnë të përforcojnë repartin ofensiv për gjysmën e dytë të sezonit. Njohja e ambientit, tifozëve dhe presioni i fanellës së Tiranës konsiderohen avantazhe të rëndësishme për një integrim të shpejtë të sulmuesit në skuadër.
Në kampin bardheblu besohet se Xhixha mund të sjellë menjëherë alternativa dhe konkurrencë në fazën sulmuese, duke rritur ndjeshëm potencialin ofensiv të ekipit. Një rikthim i tillë do të përfaqësonte jo vetëm një përforcim të rëndësishëm në fushë, por edhe një sinjal të qartë të ambicieve të Tiranës për të luftuar fort në pjesën e mbetur të kampionatit.
Në rast se operacioni konkretizohet, Tirana do të ndërtonte një triadë sulmuese shumë konkurruese me Redon Xhixhën, Ernestin dhe Tabekun, duke i dhënë skuadrës më shumë peshë dhe cilësi në repartin e avancuar.
