“Milani në krizë, Pioli në hall pa Maldinin dhe Ibrën”, – shkruan “Tuttosport”, teksa analizon kuqezinjtë në prag të ndeshjes së tyre ndaj Napolit. Një sfidë që vjen në një moment mjaft delikat, pas disfatës 3-0 në “Parce des Princes”, në Ligën e Kampionëve. Sportivja torineze vazhdon më tej: “Mbrojtja kuqezi vuan dhe sulmi nuk shënon, Milani zhytet në errësirë pas rezultateve të fundit, sidomos pas 3-0 në Paris ndaj PSG-së.
Piolit i takon të gjejë zgjidhjen për të përmbysur trendin duke nisur nga ndeshja e radhës, ndaj Napolit. Një sfidë bazë për rrugëtimin e kuqezinjve. E sigurt është se në momentin e parë të vështirë të sezonit po bën shumë zhurmë mungesa e një “lider maximo” në dhomat e zhveshjes si Zlatan Ibrahimovic dhe e një menaxheri me karizmën dhe staturën morale të Paolo Maldinit”.
Milani ecën përpara me Stefano Piolin, gurthemelin e projektit të kuqezinjve. Kjo u shfaq në orët pas humbjes ndaj PSG-së. Orë delikate, por që nuk çuan në ndryshimin e njeriut të stolit. Siç raportohet nga “Gazzetta dello Sport”, klubi bëri këtë arsyetim: në Paris, kundër një skuadre që shpenzon shumë më tepër dhe është padyshim më e fortë, mund të ndodhë që të humbasësh (edhe pse ndoshta jo kështu).
Ndaj, fokusi është te ndeshja e së dielës në mbrëmje kundër Napolit, për të mbyllur një triptik të zjarrtë që nisi me Juventusin dhe vijoi me PSG-në. Megjithatë, mbeten disa tema taktike që nxori në pah ndeshja ndaj parizienëve: agresivitet i lartë, ekip i gjatë, vështirësi në mbrojtje dhe duelet një kundër një, mungesë finalizimi. Do të nevojiten zgjidhje të reja, ndoshta më pak ekstreme se 3-5-1-1./telesport/
