Nëse mendoni se presidentët e klubeve shqiptare janë të vetmit që kanë pretendime të çuditshme ndoshta duhet të ndërroni mendje pas asaj që ka bërë presidenti i një klubi i cili këtë edicion luan në Serinë A.
Masimo Çelino, presidenti i Breshias të sapongjitur në elitë, u ka kërkuar Donarumës, Ndojit dhe Martelës, tre lojtarë të përfaqësuar nga Mario Xhiufredi, që të ndërronin menaxher ose do të largoheshin nga klubi, ndonëse ishin ndër elementët më cilësorë.
Ka qenë vetë menaxheri italian, i cili përfaqëson edhe Elseid Hysajn, Ledjan Memushajn e Frederik Veselin, ai që ka treguar se çfarë ka ndodhur në një intervistë për “TMW”. “Unë jam shumë i lumtur për kampionatin e Breshias që u kthye në Serinë A pas 8 vitesh.
Mendoj se kam dhënë një kontribut të vogël meqë afrova Donarumën në skuadër dhe që kur kam marrë në administrim Ndojin, ka pasur përmirësim në paraqitje. Por ka ndodhur diçka shumë e rëndë”, tregoi Xhiufredi.
“Çelino ka telefonuar lojtarët e mi dhe u ka thënë “ose ndërroni menaxher, ose shkoni diku tjetër”. Lojtarët i janë përgjigjur se kanë besim te unë. Nëse Çelino dëshiron që të krijojë këtë situatë, atëherë të tre do të largohen.
Por këtë situatë nuk e dua as unë dhe as lojtarët. Ka krijuar një klimë të vështirë dhe djemtë nuk duan që të qëndrojnë më te Breshia për shkak të kësaj situate. Asnjë president nuk duhet t’i lejojë vetes t’i thotë një lojtari që nëse nuk ndryshon menaxher do ta largojë nga skuadra.
Nuk di as ta shpjegoj pse. Unë kam hequr dorë edhe nga një pjesë e pagesës prej 25000 që më takonin, si gjest bashkëpunimi ndaj presidentit. Për të mirën e Breshias dhe të lojtarëve, unë jam gjithmonë i hapur të flas. Por nëse presidenti vazhdon këtë sjellje, atëherë do të largohemi”, ishte shpërthimi i menaxherit italian.
Në fakt, menaxheri cilësohet si shumë problematik në Itali dhe kjo është kuptuar që kur mori në administrim Hysajn e Mario Ruin, duke bërë shpesh deklarata të cilat nuk u pëlqenin drejtuesve të Napolit ku luanin futbollistët në fjalë. /vipsport/
