Kemi parë shumë shpesh që në futbollin tonë, trajnerët ndërrohen aq shpesh sa edhe suprizohemi kur shohim se në televizion shfaqet një fytyrë tjetër nga ajo e një jave më parë. Ekipet e Superiores kanë pasur nga një mesatare prej 2.5 trajnerësh në sezon. Pra çdo ekip matematikisht e ka ndërruar dy herë trajnerin gjatë vitit.
Por ky trend duket se ka ndryshuar këtë sezon. Deri më tani kur mbrëmë është mbyllur edhe faza e parë e kampionatit mes Kukësit dhe Tiranes, e fituar 2-1 nga kuksianët është ndërruar vetëm 1 trajner. Bëhet këtu fjalë për Vuçkeviç të Laçit i cili u zëvendësua në pankinë nga Mirel Josa.
Duket se presidentët dhe drejtuesit e ekipeve janë ndërgjegjësuar se jo çdo herë “kokë turku” duhet të bëhet trajneri. Iu duhet lënë koha e duhur për të punuar gjithë trajnerëve aë edhe të njohin më mirë skuadrat e tyre. Ky duket një mentalitet pozitiv që po zë vend në futbollin shqiptar.
Disa ekipe si Vllaznia, Tirana, Partizani, Kastrioti, Egnatia, Teuta dhe Skënderbeu kanë ende në krye të pankinave përkatëse trajnerët e sezonit të shkuar. Kjo tregon se drejtuesit mund të kenë një plan afatgjatë për skuadrat e tyre dhe ndërrimet e shpeshta të trajnerëve nuk ndihmojnë në këtë pjesë.
Endri ÇINARI
