Bayern Munich ka shitur më shumë se 100,000 maska të dizajnuara me ngjyrat dhe logon e klubit në vetëm 24 orë, siç raportohet nga shoqëria bavareze në faqen e saj të internetit.
Një sukses i jashtëzakonshëm dhe në një farë mënyre i papritur: Bayern, në fakt, kërkoi nga tifozët pak “mirëkuptim” pasi, për shkak të numrit të madh të porosive, koha e pritjes do të jetë relativisht e gjatë.
Të ardhurat nga shitja e maskave do të shkojnë në një platformë dhurimi të krijuar nga lojtarët Joshua Kimmich dhe Leon Goretzka nga e cila do të mbështeten institucionet bamirëse dhe shoqërore të përfshira në luftën kundër koronavirusit. Nga e diela do të ketë një detyrim në Bavari të vendosin maskë në transportin publik dhe në dyqane.
“Me këtë veprim, ne duam të demonstrojmë që FC Bayern do të bëjë gjithçka për të qenë një model disipline në luftën kundër koronavirusit, pas apelit të kryeministrit bavarez, Markus Söder për këtë çështje,” tha presidenti i Këshillit të Administrimit të klubit, Karlheinz Rummenigge.
“Në të njëjtën kohë, ne jemi të kënaqur që kemi mundësi të kontribuojmë në iniciativën e Joshua Kimmich dhe Leon Goretzka,” shtoi ai. Maskat ishin realizuar me shallet që Bayern planifikoi të shpërndajë në Allianz Arena në ndeshjen e kthimit të ndeshjes së Champions League kundër Chelsea me rastin e 120 vjetorit të themelimit të klubit. Maskat për fëmijë kushtojnë 5,95 euro dhe për të rriturit 6,95.
