Teuta ka ruajtur vendin e parë në renditjen e Superiores duke fituar ndaj Skënderbeut në fushën e korçarëve, e duke u hakmarrë kësisoj për eliminimin në Kupën e Shqipërisë.
Edhe pse ka qenë një ndeshje pa shumë raste për t’u shënuar, durrsakët në fund kanë marrë tre pikët që i nevojiteshin për të mbajtur vendin e parë në klasifikim, falë një penalltie të fituar në fundin e pjesës së parë.
Skënderbeu u mundua të reagonte por traversa i mohoi golin Marës, ndërsa më pas e kishte të vështirë të gjente hapësira në mbrojtjen hermetike të Teutës që administroi me kujdes sfidën edhe pse nuk arriti të shtonte diferencën me kundërsulmet e saj. Gjithsesi, edhe rezultati 1-0 i mjaftonte për vazhduar ecurinë në kreun e renditjes, e ndërgjegjshme që është në rrugën e duhur për të siguruar titullin. Kurse Skënderbeu nuk përfitoi nga hapat e gabuar të skuadrave më sipër për të përmirësuar pozitat në klasifikimin e Superiores.
Skënderbeu-Teuta 0-1
43′ (p) Bregu
Skënderbeu: Dajsinani, Meksi, Vitija, Bajrami (76′ Rapaj), Sadriu, Zguro, Mara, Taipi (62′ Vangjeli), Zhan Viktor (89′ Douna), Berisha, Mensah
Trajner: Migen Memelli
Teuta: Frashëri, Todorovski, Hoxha, Arapi, Xhekson (77′ Kuros), Aleksi, Daja, E. Vila, L. Vila (65′ Krasniqi), Bregu, Gruda (90’+1′ Beqja)
Trajner: Edi Martini
KV: L. Vila / Sadriu, Zguro, Mara
Gjyqtar: Kreshnik Cjapi
MINUTË PAS MINUTE
90’+5’ Mbyllet ndeshja me fitoren minimale të Teutës.
90’ Jepen 4 minuta shtesë.
84’ Vangjeli harkon në zonë për Mensah, i cili rrëzohet pas kontaktit me Arapin, gjyqtari bën shenjë që loja të vazhdojë.
78’ Pas një goditje dënimi, Krasniqi devijon në zonën e durrsakëve, por Dajsinani me këmbë ruan të paprekur katërkëndorin e portës së tij.
71’ Hoxha eviton probleme para portës së tij kur topi harkohet drejt Mensah në qendër të zonës, duke i larguar sferën sulmuesit.
66’ Goditje dënimi thuajse perfekte e Marës me të majtën, topi kalon murin por përplaset në traversën e portës së Frashërit. Shpëtojnë durrsakët.
63’ Mara harkon për Mensah, por ai nuk arrin të kthejë sferën drejt portës. Në vijimin e aksionit topi shkon te Berisha i cili gjuan nga jashtë zonës, por e fluturon atë shumë larg katërkëndorit.
58’ Bregu bën një tjetër lëvizje diagonale nga e majta derisa gjen hapësirën për të gjuajtur, por tentativa e tij ndalet nga mbrojtësit që evitojnë rrezikun në portën e Dajsinanit.
51’ Një goditje dënimi e harkuar nga Mara në zonën e Teutës shkakton panik para portës së Frashërit, por më pas Aleksi largon sferën për të mos rrezikuar katërkëndorin e durrsakëve.
46’ Rifillon ndeshja pa ndryshime në radhët e dy skuadrave.
45’+1’ Mbyllet pjesa e parë më avantazhin e Teutës.
45’ Jepet 1 minutë shtesë.
45’ Bregu shfaqet përsëri rrezikshëm në krahun e majtë, pason në qendër por gjen në kundërkohë Grudën i cili nuk përfiton.
