Në një eksod të madh është klubi i Kukësit pasi në javët e fundit janë larguar më shumë se gjysma e skuadrës. Duke filluar që nga portieri Halimi, e deri te sulmuesi Barbosa, verilindorët kanë humbur futbollistët kryesorë të sezonit të shkuar.
Së fundmi, as Ebert Kardozo nuk do të jetë më pjesë e Kukësit. “Panorama Sport” mëson nga burime zyrtare në klubin verilindor, se me mbrojtësin brazilian është prishur marrëveshja, edhe pse kishte opsionin e rinovimit të kontratës. Palët janë ndarë pas një bisede që kanë pasur gjatë ditës së djeshme.
Pak ditë më parë, Kukësi njoftoi edhe largimin e Xhonson Opong ndërkohë që edhe Gjelbrim e Shqiprim Taipi kanë njoftuar largimin, teksa Basha, Ndreca, Dragoshi, Peposhi e Bytyçi janë të tjerë lojtarë pa kontrata.
