Erdenis Gurishta ishte një nga largimet e rëndësishme këtë sezon nga ekipi i Vllaznisë. Për kapitenin u mendua se do ishte shumë e vështirë të gjehej një zëvendësues, por tek shkodranët duket se e kanë gjetur një të tillë. Në fakt ndoshta nuk mund të quhet një zbulim pasi luajti ndeshje pozitive edhe sezonin e shkuar. Dhe këtu fjala është për Geralb Smajlin.
Futbollisti 21-vjeçar po e mbulon më së miri rolin e mbrojtësit të djathtë duke qenë një nga lojtarët më në formë tek kuqeblutë. Numri 2 tashmë kishte një performancë shumë pozitive edhe në ndeshjen e kthimit ndaj Linfield. Ku nga një krosim i tij perfekt erdhi edhe goli i vetëm i shënuar në atë takim nga Bekim Balaj.
Po ashtu niveli i Smajlit edhe dje kundër Laçit në miqësore ishte shumë i kënaqshëm. Po nga ai u “gatua” edhe goli i parë i ndeshjes i shënuar nga Mala. Ku pas një aksioni të rrjedhshëm në krahun e djathtë mes tij dhe Çobes, Smajli jep një harkim të përkyer. Që shfrytëzohet në maksimum nga Esat Mala për shifrat provizore 1-0.
Tashmë lojtari i shpresave të Shqipërisë duket se është një garanci në krahun e djathtë. E patjetër këtë sezon pritet akoma më tepër nga ai. Ku me siguri në linjën e djathtë të mbrojtjes, Smajli do jetë titullai i kuqebluve në sezonin e ri në Superiore. Edicion që do startojë në javën e tretë të muajit gusht.
Endri ÇINARI
