Vetëm 8 vjeç, por futbollin e ka shumë pasion. Ka vetëm një vit që ka nisur ta ushtrojë atë rregullisht, por menjëherë ka nisur të spikasë për talentin e tij. E kemi fjalën për Brion Pjetranin. Ai ditën e sotme ka marrë diplomën si mesfushori më i mirë i turneut “AUTOCHTHONUS 2025” për grupmoshën U9. Një diplomë që ia ka dorëzuar ish- futbollisti i Vllaznisë Rubin Hebaj.
Brion ka spikatur në këtë turne për performancën e tij me ekipin e Vllaznisë që drejtohet nga trajneri Arben Parmeza. I brishtë në trup dhe ndoshta edhe jo me gjatësinë e duhur, por me një teknikë për t’u admiruar, vizion loje, por edhe aftësi shumë të mirë për të realizuar.
Në fakt Brioni futbollin e ka edhe traditë familjare. Gjyshi i tij- Toma ka qenë një futbollist i spikatur para viteve ’90 në nivelin amator, ndërsa më pas ka qenë xhaxhai i tij- Floriani i cili luajti futboll me ekipet zinxhir të Vllaznisë, për të mbërritur deri tek ekipi i parë i saj, por për arsye të ndryshme nuk arriti të luante gjatë me të, por kaloi tek Burreli, e më pas tek Besëlidhja e Luftëtari.
Floriani ka qenë një mesfushor luftarak dhe shumë i fortë, por i nipi- Brioni është një natyrë krejt tjetër. I pëlqen futbolli i bukur dhe dëshiron të argëtohet kur e ka topin në këmbë. Megjithatë është shumë herët për të folur për të ardhmen.
E rëndësishme është që ky lojtar i datëlindjes 28 korrik 2017, e dashuron këtë lojë dhe po ashtu ka edhe mbështetjen e madhe të familjes. I ati- Erioni, e ushtron rregullisht futbollin edhe ai si amator dhe është gjithmonë pranë tij kur i ka mundësitë sepse puna e tij mes Shqipërisë dhe Italisë nuk ia lejon gjithmonë një gjë të tillë, por është gjyshi ai që i qëndron gjithmonë afër dhe e ndihmon të ndjekë pasionin e tij.
Burimi: Gazeta “Shkodra Sport”
