Ish-futbollistja e Vllaznisë Uendi Muja, prej rreth një viti e gjysmë është transferuar së bashku me familjen në Francë, duke vijuar karrierën në Kategorinë e Dytë të shtetit transalpin.
Sulmuesja, e cila nesër feston 21 vjetorin, në një intervistë për “Panorama Sport”, flet për hapat e parë në botën e futbollit, si dhe rrëfen eksperiencën jashtë Shqipërisë.
Ajo shpreh gjithashtu keqardhjen që nuk ishte pjesë e Vllaznisë në kualifikimin historik mes 32 skuadrave më të mira në Champions. Ndërkohë, përveç talentit në futboll, Uendi njihet edhe si një prej femrave më të bukura shqiptare. E ëmbël dhe me linja perfekte, futbollistja seksi konfirmon dëshirën që ka për të qenë pjesë e botës së modelingut…
Uendi, si ju ka lindur pasioni për futbollin?
Si çdo fëmijë, edhe unë kam pasur shumë dëshira. Një ndër to ishte sporti i futbollit, gjë që me kalimin e kohës u bë pasion e deri në profesion.
E mbani mend golin e parë që keni shënuar me ekipin e të rriturave?
Po, sigurisht që e mbaj mend, golat janë një nga sukseset e çdo sportisti.
Si do ta përshkruani eksperiencën në Francë?
Është një kampionat ku ka konkurrencë shumë më të madhe dhe emocionet nuk mungojnë në asnjë ndeshje. Aktualisht luaj në Kategorinë e Dytë, ndërsa pres që në sezonin e ardhshëm të firmos me ndonjë prej ekipeve të Kategorisë së Parë.
Ju mungon Shqipëria? Keni menduar ndonjëherë të riktheheni?
Shqipëria është pjesë e zemrës sime, por kthimin në Shqipëri nuk e mendoj.
Vllaznia bëri një paraqitje historike në Champions, ju vjen keq që nuk ishit pjesë e atij grupi?
Dëshira ime, sikurse edhe e ekipit, ka qenë ecuria në Champions. Më vjen keq që nuk isha pjesë e arritjeve të skuadrës, por mbi të gjitha kam qenë gjithashtu shumë e emocionuar dhe e lumtur për arritjet e Vllaznisë.
Cila është pika juaj më e fortë?
Karakteri.
Po ajo më e dobët?
Një vajzë me karakter të fortë nuk ka pika të dobëta (qesh).
Me cilën skuadër jeni tifoze?
Jam një fanse e Real Madridit.
Lojtari dhe lojtarja e preferuar?
Kristiano Ronaldo dhe Alex Morgan.
Çfarë ju pëlqen më shumë të bëni në kohën e lirë?
Të kaloj kohë me familjen dhe shoqërinë.
Çfarë ju pëlqen tjetër përveç futbollit?
I preferoj shumë të gjitha sportet, por një nga pasionet e mia më të mëdha është të udhëtoj.
Ju njiheni si një prej futbollisteve më të bukura shqiptare (dhe jo vetëm). Keni menduar ndonjëherë t’i futeni modelingut?
Po, e kam menduar dhe nuk kam hequr dorë nga kjo dëshirë…