Është mbyllur me gol të Bruno Ditës ndeshja në “Selman Stermasi”, Skënderbeu fiton 0-1 kundër Partizanit dhe marshon me kokën lartë drejt titullit kampion.
Partizani pas një loje të kënaqshme shpërdoron dhe humbet shansin për t’u rikthyer në vendin e tretë në tabelën e klasifikimit.
Europa Edhe më larg për “Demat”, të cilët në fundin e ndeshjes kanë kundër edhe tifozët e tyre, të cilët nuk e prisnin këtë humbje në ndeshjen vendimtare dhe ndaj një kundërshtari që duhej mundur patjetër pas thumbave në distancë.
Pjesa e parë – Ndryshimet e bëra në formacion nxjerrin në pah dhe dobësitë e formacionit të Skënderbeut në pjesën e parë të ndeshjes.
Është ekipi i kuq që arrin që të zotërojë lojën në 45 minutat e para. Duke u kushtëzuar dhe nga dalja e detyruar e Lucas Cardoso-s për shkak të dëmtimit, futja e Bardhit në fushë i ka dhënë një tjetër ritëm sulmit, megjithatë, shifrat mbeten të pandryshuara.
Formacioni i Klevis Dalipit është treguar më kërkues në pjesën e parë, duke e vënë në vështirësi të dukshme ekipin e Skënderbeut.
I janë afruar golit me Bardhin dhe Abdurrahimin të kuqtë, por që nuk kanë arritur që të konkretizojnë në rrjetë.
Pjesa e dytë – Skënderbeu në pjesën e dytë shfaqet me një fytyrë tejet të re. Lojë sulmuese dhe aksione të njëpasnjëshme, por pa u konkretizuar me gjuajtje në kuadrat.
Mungesa e Soue në sfidën e sotme tregoi qartë se korçarët e kanë të vështirë të gjuajnë kuadratin.
Por, me hedhjen në fushë të Krasniqit ndryshon paksa moduli i bardhekuqve që referohen në pikën kyçe, sulmin, megjithatë, goli sërish është larg.
Partizani nga ana e tij bën të pamundurën për të mbajtur lojën nën kontroll, por nuk është më i njëjti si në pjesën e parë.
Ekipi i kuq duket më i tërhequr pas, ndoshta dhe për shkak të kundërshtarit që per minuta me radhë e mbajti lojën në gjysmëfushë.
Megjithatë, në fundin e takimit të dyja skuadrat i patën mundësitë, më i qartë rasti i Skënderbeut me Lilajn, por që mesfushori gjuajti jashtë.
Por, në kohën shtesë ndodh gjithçka, më saktë ajo që nuk pritej te Partizani. Faull i Ibrahimit, i cili iu kushton rëndë “Demave”.
Ekzekutim i bukur nga Lilaj, topi kthehet te Dita, që gjen kohën ta kontrollojë dhe fort me të djathtën e dërgon në rrjetë.
Topi kalon përpara duarve të Alban Hoxhës dhe 0-1! Shpërthen ekipi dhe tifozeria korçare!
Mbyllet këtu takimi, Skënderbeu pret javën e ardhshme Kukësin në ndeshjen vendimtare për t’u shpallur matematikisht kampion.
Ndërprerja – Mjafton një parakalim i mbrojtësit të Skënderbeut Kristi Vangjeli para ultrasve të kuq dhe situata ndizet.
Tifozët që nisin të shajnë mbrojtësit, madje nuk kursejnë as shishet me ujë drejt tij.
Por, kjo nuk k kaluar pa u vënë re nga kryesori Andi Koçi që ka ndërprerë menjëherë ndeshjen dhe i ka kërkuar kapitenit të Partizanit që të qetësojë tifozët.
Por, përkundrazi, në minutën e 73 situata u agravua më keq. Sharje ndaj FSHF-së, Dukës dhe lojtarëve të Skënderbeut që vazhduan për 4 minuta.
Normalisht, u mendua edhe ndërprerja përfundimtare e takimit, por pas konsultimit me delegatin e ndeshjes takimi rinisi.
Partizani – Skënderbeu 0-1
Shënues: Dita 90’+5’
