Një nga takimet më interesante të kësaj jave do të jetë edhe sfida mes Erzenit dhe Vllaznisë. Duel ky që do të luhet ditën e sotme në orën 13:30 në “Egnatia Arena”. Shkodranët janë skuadra e momentit në Superiore, teksa kanë siguruar 4 fitore rresht në kampionat.
Ndërkohë nga krahu tjetër shijakasit u ndalën në barazim me Laçin. Skuadra e drejtuar nga Alfred Deliallisi do të hyjë në fushë për të siguruar pikë, ndërkohë përballë do të ketë “djemtë” e Qatip Osmanit. Historia e përballjeve mes dy ekipeve flet në favorin e Erzenit.
Në 6 duelet e fundit të zhvilluara në Superiore, 2 sfida janë fituar nga shijakasit, ndërsa vetëm në një rast shkodranët ia kanë dalë të sigurojnë 3 pikët. Në 3 raste gjithçka është mbyllur në barazim mes tyre.
Si shijakasit ashtu edhe shkodranët fitoret i kanë siguruar në stadiumet e tyre, teksa asnjëra prej ekipeve nuk ia ka dalë të fitojë në fushën asnjanëse.
Mbetet të shihet nëse kuqeblutë do të shfrytëzojnë momentin e mirë në kampionat dhe të triumfojnë në transfertë ndaj Erzenit, e cila do të ishte e 5-ta radhazi në Superiore./newsport/
