Një duel për hakmarrje. Kështu po e përgatit Luis Enrike ndeshjen kundër Italisë, të programuar në fillim të tetorit që do të jetë e vlefshme për gjysmëfinalen e Ligës së Kombeve.
Spanja do të kërkojë të lërë pas humbjen e pësuar në një tjetër gjysmëfinale, atë të Europianit 2020, gjatë së cilës axurrët dolën fitues pas gjuajtjes së 11- metërshave.
Shpalljen e listës së lojtarëve të thirrur për të përfaqësuar iberikët, trajneri e shoqëroi me një deklaratë ku foli për kundërshtarët, pritshmëritë dhe të ardhmen.
Italia – “Axurrët janë në krye tashmë, kanë fituar Europianin me meritë dhe kanë një rekord pathyeshmërie, por ashtu si thotë edhe psikologu ynë e kanë shumë afër humbjen… .
Mund t’i kishim mundur edhe gjatë verës, por nuk u treguam të zotët. Ata luajnë në nivele të larta dhe kanë thuajse të njëjtën filozofi loje me tonën, ndaj shpresoj që të prodhojmë një ndeshje spektakolare”.
BOTËRORI – “Unë dua të fitoj çdo ndeshje, jo vetëm këtë me Italinë. Të njëjtën grintë e dëshirë e shikoj edhe te lojtarët e mi. Jemi shumë të motivuar duke qenë se afron edhe “Botërori 2022″. Qëllimi ynë normalisht që është maja, duam të shpallemi kampionë.
Për sa i përket hipotezës së Botërorit në çdo dy vite, më emocionon shumë, por nuk është kaq e thjeshtë.
Duhet të unifikojmë kalendarin sepse nëse nuk e bëjmë ata që do e vuajnë do të jenë futbollistët. E kuptoj që për tifozët, për të rinjtë dhe për shumicën është një mundësi e mirë dhe më shumë spektakël, por duhet të kemi kujdes sepse bëhet fjalë për të ardhmen”.
BARCELONA – “I kam dërguar ftesë edhe Gavit, 17-vjeçarit të Barcelonës sepse e njoh prej shumë kohësh dhe kam shumë besim në aftësitë e tij. Normalisht që ka shumë për të përmirësuar, por deri më tani ka treguar një nivel të lartë dhe do të jetë në lartësinë e detyrës.
Pastaj e ardhmja e stolit të Barcelonës është diçka tjetër. Nuk besoj se do të më telefonojnë për të zëvendësuar Ku manin. Laporta nuk e ka numrin tim… . Unë kam rinovuar me kombëtaren dhe do të qëndroj këtu sepse jam njeri që e mbaj fjalën time”.
MANÇO THËRRET KAMPIONËT – Ndërkohë, mbrëmjen e vonë të ditës së djeshme, edhe trajneri i Italisë, Roberto Mançini, i cili do të provojë që të mposhtë sërish Spanjën, në gjysmëfinalet e Ligës së Kombeve, dje ka përpiluar listën e tij të 23 lojtarëve që do të kërkojnë të fitojnë edhe këtë turne.
Kreu i pankinës “Axurre”, ndryshe nga çfarë pritej, nuk ka dashur që të ftojë asnjë risi në komvëtare, por ka grumbulluar të gjithë grupin finalist dhe kampion të “Euro 2020”.
