Përpos lajmeve negative nga kampi shkodran, ka edhe lajme të mira në pragndeshjen me Skënderbeun.
Mungesat e shumta të lojtarëve për arsye kartonash dhe dëmtimesh, mund të kompesohen me një rikthim.
Bëhet fjalë për atë të mbrojtësit Antonio Marku. 25 vjeçari ka mbi një muaj që është i pamundur për të qenë pjesë e skuadrës si pasojë e një dëmtimi të pësuar.
Por nga sot, ai i është bashkuar pjesës tjetër të futbollistëve dhe ka zhvilluar një stërvitje me ngarkesë të plotë.
Rikthimi i tij duket në momentin më të mirë. Siç dihet, për ndeshjen ndaj korçarëve do të mungojë për arsye kartonash mbrojtësi i majtë Mersini.
Trajneri Gjoka tashmë e ka një alternativë të gatshme për këtë pozicion por të mos harrojmë se në mbrojtje mungojnë edhe mbrojtësi i djathtë Gocaj dhe ndoshta edhe ai i qendrës Malota.
Për këtë arsye, duhet parë mënyra si do të kompozohet ky repart për ndeshjen ndaj Skënderbeut.
© shkodrasport.com
