Ekipi i Tiranes konfirmoi formën e saj optimale me fitoren mbrëmë kundër Partizanit në derbin e kryeqytetit. Bardheblutë fituan në shifrat 1-0 me anë të një penalltie të shndërruar në gol nga Limaj. Kjo ishte fitorja e tretë rradhazi për 25 herë kampionët e vendit.
Laçi, Teuta dhe Partizani ishin viktimat e njëpasnjëshme të Tiranes. Ekipi i drejtuar nga Orges Shehi ka marrë pikët e plota në sfidat direkte me rivalët që pretendojnë për titull. Tashmë kryqytetasit janë të vetëm në krye të renditjes me një kuotë prej 14 pikësh.
Fundjava që vjen do i gjejë rekordmenët e futbollit tonë në Shkodër, ku do gjejnë përballë Vllazninë. Klasikja e Shqipërisë i gjen skuadrat në humore të ndryshme. Nga njëra anë një Tiranë fituese dhe dominuese ndaj kundërshtarëve e nga ana tjetër kuqeblutë që duhet të reagojnë pas humbjes me Kukësin.
Tirana vjen në formën e duhur në ndeshjen e “Loro Boriçit”, por do ketë edhe një mungesë të rëndësishme. Mbrojtësi Filip Najdovski ka plotësuar numrin e kartonave dhe do mungojë të shtunën. Nga ana tjetër te Vllaznia nuk do jenë të gatshëm Gurishta dhe Mustedanagic që gjithashtu janë të pezulluar me kartona. Endri ÇINARI
