Nga Endri ÇINARI
Vllaznia hap ditën e nesërme javën e 10-të të Superiores me ndeshjen kundër Kukësit. Duel që po ashtu ngre siparin edhe të fazës së dytë të kampionatit, ku tashmë patjetër gara do jetë më e fortë nga java në javë. Shkodranët udhëtojnë drejt veri lindjes me humorin e duhur, ku fitorja ndaj Skënderbeut ka larguar disi krizën që po kalonin kuqeblutë.
E tashmë tek ekipi i Memellit duan të krijojnë vazhdimësinë duke nisur që nga dueli i nesërm në “Zeqir Ymeri”. Dhe transfertat e fundit kuksiane kanë qenë pozitive për skuadrën shkodrane. Kështu sezonin e shkuar Vllaznia mori një barazim 0-0 në Kukës e po ashtu një fitore 0-1, e vendosur nga një super gol i Hakajt.
Po ashtu në sezonin 2021-22, Vllaznia ka arritur një barazim pa gola ndaj Kukësit. E ndërsa humbja e fundit ndaj Kukësit shënohet në vitin 2021. Ku verilindorët fitonin 2-0 falë golave të Taipit dhe Ndrecës. Patjetër tek kuqeblutë duan të ruajnë trendin e viteve të fundit ndaj kuksianëve.
Ndeshja do luhet nesër në orën 14:00 në qytetin e Kukësit. Një duel që pritet goxha interesant dhe që ka dhuruar përballje shumë të bukura ndër vite.
