✍️ Shkruar nga “Shkodra Sport”
Basania nuk ia ka dalë të marrë pikë në ndeshjen e rradhës për kampionat, atë të luajtur pasditen e sotme në fushën sportive të Bushatit ndaj ekipit të Sopotit. Ky i fundit ka luajtur më mirë dhe si rrjedhojë ka fituar me rezultatin e pastër 3-0.
Duhet thënë se deri në minutën e 35-të loja ka qenë e barabartë për të dy ekipet të cilët kërkoni t’i imponoheshin njëri- tjetrit, ndonëse munguan rastet e pastra. Por në këtë moment, pas një goditje standarte Tanushi godet saktë me kokë dhe topi përplaset fillimisht në traversë dhe më pas kalon vijën fatale duke zhbllokuar rezultatin në favor të Sopotit.
Pjesa e parë do të mbyllej me shifrat 1-0 për miqtë nga Librazhdi. Në të dytën nuk mungojnë përpjekjet e vendasve për të barazuar por lojtarët e tyre janë të paqartë. Megjithatë gjithçka do të merrte fund sa i takon shpresave të tyre në minutën e 63-të.
Aminu me një kundërsulm të shpejtë, futet në zonën e Basanias dhe godet fort me të djathtën. Topi përplaset në traversë dhe futet sërish në zonë, aty ku Myslimi me një hedhje të bukur me kokë e dërgon për herë të dytë në rrjetën e portës së Basanias.
Ndërkohë në minutën e fundit të shtesës, Basania është pranë golit, por topi përplaset në shtyllë dhe Sopoti nis menjëherë kundërsulmin duke realizuar edhe golin e tretë me anë të Eyoh. Përfundimisht 3-0 për Sopotin që me këtë fitore ngjitet në kuotën e 16 pikëve dhe mban vendin e tretë në renditje, ndërsa Basania mbetet me 6 pikë në vendin e tetë.
Burimi: Gazeta “Shkodra Sport”
