Konfirmohet lajmi i Gazeta “Shkodra Sport”. Drejtuesit e Vllaznisë kanë arritur marrëveshje me ato të CSKA Sofia për huazimin deri në fund të sezonit të futbollistit Kevin Dodaj. Ky i fundit nuk po gjen hapësirat e duhura për të luajtur tek skuadra bullgare dhe si rrjedhojë në Shkodër mund të rigjejë vetveten.
Lajmin e ardhjes sërish tek Vllaznia të sulmuesit 20 vjeçar e ka pohuar edhe vetë zëvendëstrajneri Ergi Borshi i cili pas ndeshjes së djeshme ndaj Partizanit është shprehur:
“Mund të konfirmoj se kemi finalizuar marrëveshjen për rikthimin e Dodajt dhe besoj se këto dy ditë ai do të jetë në Shkodër për t’iu bashkuar skuadrës në stërvitje”.
Por a do ketë lëvizje të tjera në merkato nga Vllaznia? Numri 2 i pankinës shkodrane e mohon këtë gjë duke thënë: “Nuk besoj se do ketë afrime të tjera. Presim vetëm rikthimin nga dëmtimet të Kouros, Dros dhe Hakajt dhe mendoj se skuadra është e kompletuar në çdo repart”.
